Global Voices sa Filipino

Filipino

Nagsasalita ang mundo, nakikinig ka ba?

Pagtugtog ng instrumentong Ndjerendje na binuo ni Ruben Mutekane. Maputo, Mozambique (Setyembre, 2012). Bidyong kuha ni Miguel Mangueze sa YouTube

Sa bayan ng Maputo, Mozambique, mapapanood si Ruben Mutekane na kumakanta at tumutugtog ng Ndjerendje, isang instrumentong kanyang inimbento. Mapapanood dito ang maikling bidyong kuha ni Miguel Mangueze (@FotoMangueze).
More »

Itinalaga ang ika-22 ng Setyembre, 2012, bilang World Rhino Day. Sa kasalukuyan, tinatayang may 22,000 puting rhino at 4,800 itim na rhino [en] ang natitira sa Aprika. Dahil sa walang habas na pagdakip ng mga ito, pinapangambahang tuluyang maubos ang dalawang species ng rhino pagdating ng 2025! Narito ang ilang impormasyon [en] hinggil sa iligal na kalakal ng mga sungay ng rhino.

Petisyong ‘Aman Ki Asha Milne Do’

Mahigpit sa pagbibigay ng visa ang mga bansang Indiya at Pakistan para sa mga mamamayang gustong bumisita sa kani-kanilang pamilya sa karatig-bansa. Sa kasalukuyan, may bagong idinagdag na alituntunin o protocol para sa pagkuha ng tourist visa sa pagitan ng dalawang bansa sa Timog Asya. Isinusulong ng inisiyatibong ‘Journeys To Democracy’ [en] ang petisyong ‘Aman ki Asha Milne Do’ [en] upang tuluyan itong mabago.

Martsa ng mga Kababaihang Togolese, litratong kuha ng grupong Let's Save Togo, mula sa Flickr, may pahintulot sa paggamit.

Libu-libong kababaihan na nakasuot ng pula ang dumagsa at nagmartsa sa Lomé, kabisera ng Togo, noong ika-20 ng Setyembre upang igiit ang repormang pampulitika. Ibinahagi ng samahang Let's Save Togo ang koleksyon ng mga litrato [fr] mula sa nasabing kaganapan.

Ipinahayag ni Dan Braghis [en] kay Sylwia Presley, kasapi at awtor ng Global Voices [en], ang pagnanais nitong magpakasal sa binibini, sa gitna ng pagtitipon ng mga miyembro ng Oxford Geeks sa #OGN28. Wala namang pag-aatubiling sinagot ni Sylwia ang binata ng matamis niyang oo! Maligayang bati sa dalawa!

Sa website ng pamahalaan ng Hilagang Korea na Uriminzokkiri, iniupload ang isang bidyo [en] na may pamagat na “I'm Yushin style!” bilang panggagaya sa ‘Gangnam Style‘ [en] na pinasikat ng Timog Korea. Naging sentro ng katuwaan sa bidyo si Park Geun-hye, ang kandidato sa pagkapangulo ng kasalukuyang namumunong partido sa Timog Korea. Si Binibining Park ay anak ng dating Pangulong Park Chung-hee, na nakilala bilang isang diktador noong 1970s, kung saan sinupil ng sistemang “Yushin” [en] ang demokrasya at malayang pamamahayag sa bansa.
 

Sa bidyong kuha ni Weiwei Ai [zh] na mapapanood sa YouTube, makikita ang isang pangkat ng mga Intsik na nagsasagawa ng kilos-protesta laban sa bansang Hapon sa likod ng embahada ng Estados Unidos, kung saan kanilang hinarang ang sasakyan ni Ambassador Gary Locke. Tutol ang grupo sa polisiya ng Amerika hinggil sa ugnayang panlabas.

Paskil ng Balkans Beyond Borders Short Film Festival 2012.

Nagbukas noong ika-20 ng Setyembre sa siyudad ng Tirana ang Balkans Beyond Borders Short Film Festival 2012 [en]. Ito ang ikatlong pagkakataon na ginanap ang nasabing patimpalak; ang napiling tema [en] sa taong ito ay “MAG-USAP TAYO – pagkakaiba-ibangwika at pakikipagtalastasan”. Ang talaan ng mga isinagawang aktibidades sa loob ng tatlong araw ay makikita sa website na ito [en].